Aa Sajan Gal Lag Asade

آسجن گل لگ اساڈے، کیہا جھیڑا لایو ای
ستیاں بیٹھیاں کجھ نہیں ڈٹھا، جاگدیاں شوہ پایو ای
قم باِذنی شمس بولے، اُلٹا کر لٹکایوای
عشقن عشقن جگ وچ ہوئیاں دےولاس بٹھایو ای
میں تیں کائی نہیں جدائی، پھر کیوں آپ چھپایوای
مجھیں آئیاں ماہی نہ آیا، پھوک برہوں ڈولایو ای
ایس عشق دے ویکھے کارے، یوسف کھوہ پوایو ای
وانگ زلیخا وچ مصر دے، گھنگٹ کھول رُلایو ای
ربِ ارنی موسی بولے، تد کوہ طور جلایو ای
لن ترانی جھڑکاں والا، آپے حکم سُنایو ای
عشق دیوانے کیتا فانی، دل یتیم بنایو ای
بلھا شوہ گھر وسیا آکے، شاہ عنائت پایو ای
آسجن گل لگ اساڈے، کیہا جھیڑا لایو ای

Kalam e Bulleh Shah

Aa Mil Yaar Saar Le Meri

آ مل یارا سار لے میری
میری جان دُکھاں نے گھیری

اندر خواب وچھوڑا ہویا، خبر نہ پیندی تیری
سنجی بن وچ لُٹی سائیاں، سُورپلنگ نے گھیری

ملاں قاضی راہ بتاون، دین بھرم دے پھیرے
ایہہ تاں ٹھگ جگت دے جھیور، لاون جال چوپھیرے

کرم شرع دے دھرم بتاون، سنگل پاون پیریں
ذات مذہب ایہہ عشق نہ پچھدا، عشق شرع دا ویری

ندیوں پارملک سجن دا، لہر لوبھ نے گھیری
ستگوربیڑی پھڑی کھلوتے، تیں کیوں لائی آویری

بلھا شاہ شوہ تینوں ملسی، دل نوں دے دلیری
پیتم پاس،تے ٹولنا کس نوں، بُھل گیوں شکر دوپہری

آ مل یارا سار لے میری
میری جان دُکھاں نے گھیری